CWMNI DRAMA’R GWTER FAWR

Rhes Gefn: Sarah Hopkin (cofweinydd), Alan Pedrick,Janet Bowen, Colin Evans. Rhes Flaen: Eifion Price, Susan Thomas, Mel Morgans (Cynhyrchydd), Lisa Lewis Jones, Euros Jones

Llongyfarchiadau i’r cwmni ar eu llwyddiant yn Eisteddfod Genedlaethol  Wrecsam a’r Fro yn ystod wythnos gyntaf mis Awst. Roeddent yn cymryd rhan mewn Cystadleuaeth Gŵyl Ddrama Awr Ginio yn Theatr  y Maes, ac eleni, yn wahanol i’r arfer, derbyn gwahoddiad wnaethant i gymryd rhan er mwyn dathlu’r ffaith fod yr Eisteddfod yn  dathlu ei phenblwydd  yn 150 !  Ar ôl gwylio pump drama fer, hollol wahanol i’w gilydd, o Ddydd Llun i Ddydd Gwener, gan gwmnїau o bob rhan o Gymru, penderfynodd y beirniaid , Carys Tudor Williams a Carys Edwards , mai Cwmni Drama’r Gwter Fawr oedd yn haeddu’r wobr gyntaf. Fe dderbynion nhw Gwpan Gwynfor ( i’w ddal am flwyddyn) a £400. Roeddent yn perfformio comedi gan Edgar Jones  - “Dau Dad”, ac fe lwyddwyd i roi adloniant pur i theatr lawn.