Ail-gerdded y Daith i’r Hen Fethel

Yn dilyn llwyddiant ysgubol agoriad swyddogol Llwybr y Twrch Trwyth yng Nghwmaman ar y Dydd Gwener gyda seremoni agoriadol wych yn Ysgol y Bedol, aed ati ar y dydd Sadwrn i ail gerdded y llwybrau hynafol o Dircoed draw i’r Hen Fethel.  Arweiniwyd y daith gan Alun a Margaret a welir ar y dde yn y llun uchod gyda David Davies y Clerc, y Cynghorwr Dafydd Wyn ac eraill o Gwm Aman a’r cyffiniau yn eu dilyn.  Roedd y cerddwyr yn ymwybodol mai ar hyd y llwybr hwn y cariwyd hersi eu cyndeidiau yn yr oes a fu ar gyfer claddedigaeth ym mynwent yr Hen Fethel. Aethpwyd ar hyd y llwybr o Hewl Horni (Hewl Folland yn hwyrach) heibio i Dŷ Llwyd - o bosib yr adeilad hynaf yn y cwm – nes cyrraedd ymhen milltir neu ddwy yr Hen Fethel a gysegrwyd yn 1773.  Mawr fu edmygedd y teithwyr o’r gwaith adnewyddu chwaethus a wnaed gan Emyr Jenkins a’i wir-foddolwyr.  Cerddwyd yn ôl ar hyd y llwybr uchaf heibio i Gwm Ffrwd ac roedd pawb yn falch o weld Tafarn yr Angel yn y pellter.